ஜனவரி-24 தினம் ஒரு தேவாரம் திருவாசகம் பாடலும் பொருளும் - Daily Alert

தேவாரம்

     

      சொற்றுணை வேதியன் சோதி வானவன்

      பொற்றுணை திருந்தடி பொருந்தக் கைதொழக்

      கற்றுணைப் பூட்டியோர் கடலிற் பாய்ச்சினும்

      நற்றுணை யாவது நமச்சி வாயவே

      மந்திரச் சொற்களை ஆதாரமாக உடைய வேதத்தின் முதல்வன் சிவபெருமான். அப்பெருமான், சோதி வடிவாக விளங்குபவர்;. அவருடைய ஒளிமயமான அழகிய திருவடியில் நெஞ்சைப் பதித்துத் தொழுது ஏத்த நல்ல துணையாகி விளங்குபவர். கல்லில் கட்டிக் கடலில் தூக்கி எறியப்பட்டாலும், நமக்கு துணையாக நின்று காத்தருளுவது நமச்சிவாய என்னும் திருவைந் தெழுத்தாகும்.

திருவாசகம்

  முன்னைப் பழம்பொருட்கு முன்னைப் பழம்பொருளே

  பின்னைப் புதுமைக்கும் பேர்த்தும் அப்பெற்றியனே

  உன்னைப் பிரானாகப் பெற்ற உன்சீர் அடியோம்

  உன்னடியார் தாள் பணிவோம் ஆங்கு அவர்க்கே பாங்காவோம்

  அன்னவரே எங்கணவர் ஆவார் அவர் உகந்து

  சொன்ன பரிசே தொழும்பாய்ப் பணிசெய்வோம்

  இன்ன வகையே எமக்கு எங்கோன் நல்குதியேல்

  என்ன குறையும் இலோம் ஏலோர் எம்பாவாய்.

            பழமைக்குப் பழமையும், புதுமைக்குப் புதுமையுமான எங்கள் இறைவா! உன்னைத் தலைவனாகப் பெற்ற நாங்கள் உனது திருவடிக்கே உரியவராவோம்.  உன் அடியார்களின் பாதங்களை வணங்குவோம்.  இறையடியார்களாகிய நாங்கள் இறையடிவர்களையே கணவராகப் பெறவேண்டும் அவர்களோடு எல்லா விதத்திலும் இணைந்து பணி செய்வோம்.  ஒத்த கருத்துடையவர்களோடு இணைந்து வாழும் வாழ்க்கையை எங்களுக்குத் தந்தருள்க குறைவிலா நிறைவே அருள் செய்க.

தினம் ஒரு தேவாரம் திருவாசகம் பாடலும் பொருளும்  - Daily Alert  

Thevaram Thiruvasagam Song with Meaning