ஜனவரி-26 தினம் ஒரு தேவாரம் திருவாசகம் பாடலும் பொருளும் - Daily Alert

தேவாரம்

          துஞ்சலும் துஞ்சல் இலாத போழ்தினும்

          நெஞ்சகம் நைந்து நினைமின் நாள்தொறும்

          வஞ்சகம் அற்று அடிவாழ்த்த வந்த கூற்று

          அஞ்ச உதைத்தன அஞ்செழுத்துமே.

    உறங்கும் போதும், உறங்காது விழித்திருக்கும் போதும், நெஞ்சம் கசிந்து உருகுமாறு, அஞ்செழுத்தை நினைத்துப் போற்றுக. இதனை நாள்தோறும் புரிவீராக. மார்க்கண்டேயர், நெஞசில் வேறு எண்ணம் இன்றி ஈசனையே நினைத்துத் திருவடியை வாழ்த்திப் போற்றிய காலத்தில், உயிரைக்கவர வந்த கூற்றுவனை உதைத்து அழித்தது திருவைந்தெழுத்தே.

திருவாசகம்

               ஈசனே என் எம்மானே

      எந்தை பெருமான் என்பிறவி

               நாசனே நான் யாதும் ஒன்று

     அல்லாப் பொல்லா நாயான

               நீசனேனை ஆண்டாய்க்கு

       நினைக்கமாட்டேன் கண்டாயே

               தேசனே அம்பலவனே

       செய்வது ஒன்றும் அறியேனே.

                இறைவனே, எனது தலைவா, என் அப்பனாகிய அருட்சுடரே, என் பிறப்பினை ஒழிப்பவனே. ஒன்றுக்கும் பயனற்று, உடல் உணர்வில் ஒன்றிக் கிடந்த நாயினேனைப் பரபோதம் அடையப் பெற்றவனாக்கினாய்.  அதன் பிறகாகிலும் நீ செய்த பேருதவியை நான் நினைந்திருக்க வேண்டும் நீசனாகிய நான் அதை நினைந்தேனில்லை.  அம்பலவாணா, அறிவற்ற என்னை அறிவொளி காட்டி நீயே இயக்கியருள வேண்டும்.

தினம் ஒரு தேவாரம் திருவாசகம் பாடலும் பொருளும்  - Daily Alert  

Thevaram Thiruvasagam Song with Meaning